Maibaum 2012.

A Maibam is a gschmickta Bam oda Baumstaumm am Oatsplotz oda sowos ähnlichs, dea wos im Frialing aufgstöt wiad (meistns Ende Aprü) und daun a poa Wochn oda Monat duat glossn wird. De Tradizion is hauptsächli in Östareich und Bayern zfindn. Währnd so a Maibam in Bayern oft weißblau ogfarbit is, is a in Östareich meistns "natua", monchmoi gschööt, monchmoi mit Rindn.

Zum Aufstöön vu dem Bam gheat a Blosmusi, Bier und Wirschtl und a aunschliaßnda Maitaunz. Eigntli gheats aa dazua, dass iagndwea probieat, in Maibam z'schtööhn.

In Obabayan werd da Baam fast iwaroi am erschtn Mai aufgstäid. A recht wichtige Sach bei dem Brauch is das olle zsammhäifn. Ma bracht an Haffa Leid, das ma so an Bààm afschdeid, und nua wenn de olle richtig zsammarban, ko des was wern. A recht ehrnvolle und wichtige Aufgab hod der, der ogibt, wos wer zum doa hod. Der bracht an Haufn Erfahrung, de andan nua an Haufn Kraft.

Oft is a scho as Zuwäbringa vo dem Baam zua seim Plotz a Ereignis.

In vui Ortschaftn is es aso, dass in da Nacht aufn erschtn Mai a Wach aufgstejt werd, wei de junga Leid aus de Nachbarderfa drauf aus san, den Maibam z'stejn. Wann a nachad doch gstoin werd, is des natiarle a rechte Schand. In dem Foi gebts dann a Vahandlung, wo ois Preis fias Zruckgem a Bezahlung in Naturalien ( Brotzeit und Bia ) ausghandlt werd.